!!يا حزني

بسم الله

البرادعي

بيقولك هي فوضي
مش البرادعي اللي بيقول كده ده فيلم هي فوضي , المهم اه فوضي و ممكن تبقي فوضي اكتر من قبل كده لو الفوضويين وصلوا للحكم
انا مش بذم في شخص البرادعي او بدعي انه راجل فوضوي او خلافه او اشكك في نزاهته و اخلاقيته بالعكس الراجل علي قدر لا باس به من كل هذا
لكن يا بشر يا مصريين يا بني ادمين لازم نبص للصورة الكبيرة بلاش الانسياق وراء شعارات كذابة
البرادعي بنفسه قال انه ميعرفش اذا كان هيترشح ولا لا , دي اول حاجة تاني حاجة مش من يوم و ليله الراجل هيكسب حتي لو اترشح , تقولي ليه يعني اقولك انا ليه
1- دكتور البرادعي اللي مفروض كان يعمل حملة انتخابية و يبدا يدرس ينزل فين و يعمل خطبه في انهي جامعات و انهي مدن و محافظات و انهي محافظات هي اللي مؤيديها و انهي محافظات اللي مش مؤيده , و مش مؤيداه ليه و ازاي يكسب تأيدهم.

2- اللي ايده في الميه مش زي اللي ايده في النار الراجل عاش تلات ارباع عمره بره البلد لا يعرف مشاكل البلد و لا يعرف مشاكل الشعب احنا عايزين حد من الشعب من الطبقه الوسطي و ده سبب الفشل الحالي الوزراء ناس متريشه اغنياء لا عارفين الشعب طافحن الكوته ليه و عمره اتعرض لجوع زي ما الناس بتتعرض.

3- المبالغه في الامل من ناحية الشعب في البرادعي , ( المؤمن لا يلدغ من الجحر مرتين ) لكن احنا صعايدة مع كامل احترامي للصعايدة اللي انا منهم اصلا لكن زي ما كنا متافألين بي باراك اوباما و شوفنا فيه انه هو ده اللي هينقذ العالم و طلع في الاخر راجل مش عايز غير مصلحه امريكا و النهوض بامريكا و حتي ده مش عارف يعمله و شعبيته بدات تنزل بقوة لدرجة ان متوقعين انه مش هيمسك فترة انتخابيه تانية فبلاش المبالغه في تقدير الناس و ننظر للناس بنظرة عادلة ومجزية .

نرجع لي مصر تاني
عيب البرادعي و من قبله ايمن نور انه كان الشعب مؤيدهم جدا و هما مش عارفين نقاط القوة في الانتخابات فين علي عكس ذوات الخبرة من 20 الي 25 سنة
فالسيناريو اللي هيحصل الانتخابات اللي جايه ترشيح البرادعي لانتخابات الرئاسه و ايمن نور و مرشح من الحزب الوطني الديموقراطي.
و تطلع النتايج في الاخر فوز مرشح الحزب الوطني
و المرة دي عشان البرادعي محبوب اكتر من ايمن نور في ايام عز ايمن نور فالبرادعي هياخد المرة دي 18 % بدل 12% اللي كان خدهم ايمن نور.
الوجه الايجابي ان ايمن نور عرف خطاؤه و نزل لجذب اصوات الصعيد الراجل بقي خبره برضه بس يعمل ايه ايمن نور بعد ما فقد ثقه الناس فيه حتي زوجته فقدها

انا عن نفسي امتنع عن التصويت لضعف المنافسين وفقدي لثقتي في احدهم و اكراما لصوتي الانتخابي الهام , انما لو فيه برنامج انتخابي محترم ممكن ساعتها ادلي بصوتي انشاء الله يكون المرشح اللي مقدم برنامجه الانتخابي من الصومال بس يبقي برنامج انتخابي علي قدر محترم من التنظيم و واقعي و يخدم صالح الشعب و يكبر رغيف العيش و يجبلي انبوبة بسعرها العادي و ميخلنيش استورد قمح من بره لان الشعب اللي مش عارف ياكل نفسه ميستحقش حريته لكن ده موضوع تاني هنتكلم فيه بعد يومين